ဒီမိုကရေစီသည် သွင်းကုန် မဟုတ်

Monday, December 10, 2007

ဒိုင်လူကြီး မရှိသော ဘောလုံးပွဲ


ယနေ့ ဘောလုံးပွဲများကို ကမ္ဘာတစ်ဝန်းလုံးမှ စိတ်ပါဝင်စားလျက် ရှိကြသည်ကို တွေမြင်ကြရ ပါသည်။ ထိုကမ္ဘာ့ဘောလုံးပွဲများကို ကမ္ဘာ့ဒိုင်လူကြီးများကလည်း စနစ်တကျ ကွပ်ကဲအုပ်ချုပ်လျက် ရှိကြသဖြင့် ဘောလုံးပွဲ ပွဲစဉ်များမှာ အလွန်ပင် ကြည့်ကောင်းလျက် ရှိကြသည်ကိုလည်း တွေ့မြင်ရပါသည်။

ပင်လယ်ကွေ့ရှိ အီရတ်စစ်မြေပြင်မှ ဘောလုံးပွဲများမှာကား ကမ္ဘာ့ဘောလုံးပွဲများကဲ့သို့ မည်သူ တစ်သီးတစ်ယောက်ကမျှ ကြိုက်နှစ်သစ်ခြင်းမရှိ၊ အုပ်ထိန်းရန် ဒိုင်လူကြီးများကလည်း တစ်ဦး တစ်ယောက်မျှ မရှိသဖြင့် သွေးချောင်းစီးပြီး အရိုးများ တောင်လိုပုံကာ အနိဌာရုံ စစ်ပွဲကြီး တစ်ခု ဖြစ်နေသည်ကိုသာ တွေ့ရပါသည်။

ထိုဒိုင်မရှိသော ပွဲမှာ ပင်လယ်ကွေ့ဒေသမှ အမေရိကန်နှင့် အီရတ်တို့၏ စစ်ပွဲသာ ဖြစ်ပါသည်။ ကမ္ဘာကုလသမဂ္ဂသည် ကမ္ဘာကို ပြုပြင်ထိန်းသိမ်းရသော ဒိုင်လူကြီး တစ်ဦးဖြစ်ပါသော်လည်း ထိုပွဲကို လက်ရှောင်၍ နေခဲ့သည်မှာ ကြာမြင့်ပြီ ဖြစ်ပါသည်။

စစ်ပွဲဆိုသည်မှာ ကမ္ဘာစစ်ကြီး ဖြစ်ပေါ်လာရမှသာ ပေါ်ထွက်ရစမြဲ ဖြစ်သော်လည်း ယခု အီရတ်စစ်ပွဲမှာမူ မည်သူ့ကိုမျှ ဂရုမစိုက် ဗိုလ်ကျကျူးကျော်သော စစ်ပွဲဖြစ်ပြီး သိန်းဂဏန်းမကသော လူသားတို့သည် ထိုစစ်ပွဲတွင် အတုံးအရုံး ကျဆုံးခဲ့ကြရပီး ဖြစ်ပါသည်။ ထိုအီရတ်စစ်ပွဲကြီး ပြီးဆုံးရန် မှာလည်း အရိပ်အရောင်မျှပင် ပေါ်ပေါက်ခြင်း မရှိသေးပါ။

ဤကဲ့သို့ပင် ကမ္ဘာကြီးတွင် လက်ဦးသူက မတော်မတရား ကျူးကျော်သည့် စနစ်ကို သုံးစွဲလျက် ရှိနေပြီ ဖြစ်သဖြင့် ကမ္ဘာ့နိုင်ငံအသီးသီးတို့သည် မိမိတို့ နိုင်ငံကို မိမိတို့ကပင် လုံခြုံအောင် အဘက်ဘက်မှ ထိန်းသိမ်းပြီး ထိုကျူးကျော်သူများ မပေါ်ပေါက် လာနိုင်စေရန်နှင့် ကျူးကျော်မှုများ ပေါ်ပေါက် လာပါကလည်း ကာကွယ်နိုင်ကြရန် ကြိုတင်ပြင်ဆင်မှုများ လိုအပ်လျက် ရှိနေပြီ ဖြစ်ပါသည်။

No comments: